Txorierriko Udaletako Ekonomia eta Enplegu Sustapenerako Zerbitzuak, EGAZ Txorierrik, enpresentzat, enplegua bilatzen ari diren 30 urtetik beherako pertsonak kontratatzeko dirulaguntzen Lehen Aukera programaren eskaera egiteko epea ireki dela jakinarazi du. Lanbideren ekimen horrek 13.970 eurorainoko laguntzak eskaintzen ditu kontratu mugagabeak edo prestakuntza-kontratuak formalizatzeagatik, gutxienez 6 hilabeteko iraupena duten praktika profesionalak egiteko, gutxienez % 70eko lanaldiarekin.
EGAZ Txorierrik eskualdean kudeatzen duen kontratazioa bultzatzeko programetako bat da. Ildo horretan, eta Lehen Aukera bezalako programekin, EGAZ Txorierrik laguntza ematen die enpresei kontratazio-laguntzak lortzeko kudeaketak egin ditzaten. Laguntza horiek, besteak beste, honako erakunde hauen programen barruan daude: Eusko Jaurlaritzako Enplegu Zerbitzua – Lanbide, Bizkaiko Foru Aldundia edo haraneko udalak. Horien guztien helburua Txorierrin bizi diren pertsonen enplegagarritasuna handitzea da.
Lehen Aukeraren kasuan, diruz lagundutako zenbatekoa aldatu egingo da kontratatutako pertsonaren prestakuntza-mailaren eta formalizatutako kontratuaren iraupenaren arabera. Unibertsitateko titulua duten langileen kontratazioek urtean 21.200 euro gordineko soldata izan beharko dute laguntzak jaso ahal izateko; goi-mailako tituludunen kasuan, gutxienez 18.200 eurokoa izango da, eta erdi-mailako eta profesionaltasun-ziurtagirien kasuan, lanbide arteko gutxieneko soldata, hau da, 15.876 eurokoa.
Unibertsitateko prestakuntza duten langileen kontratazioak 5.300 euroko dirulaguntza jasoko du 12 hilabete baino gutxiagoko kontratuengatik, 8.480 eurokoa 12 hilabeteko kontratuengatik eta 12.700 eurokoa kontratu mugagabeengatik. Goi-mailako gradua duten langileak kontratatzen dituzten enpresek 4.550 euro lortu ahal izango dituzte 12 hilabetetik beherako kontratuengatik, 7.280 euro urtebeteko kontratuengatik eta 10.900 euro kontratu mugagabeengatik. Azkenik, erdi-mailako gradua eta profesionaltasun-ziurtagiriak dituzten langileen kontratazioek 3.500 euroko dirulaguntza jasoko dute 12 hilabete baino gutxiagoko kontratuengatik, 5.600 eurokoa urtebeteko kontratuengatik eta 8.400 eurokoa kontratu mugagabeengatik. Kopuru horiek guztiak % 10 igoko dira kontratatutako pertsona emakumea bada.
Interesa duten enpresek 2024ko urriaren 31 baino lehen egin ahal izango dute eskaera. Horretarako, EGAZ Txorierriren egoitzara joan daitezke (Txorierri etorbidea, 46, Berreteaga bidea, 13A – Sondika), 944 536 370 telefonora deitu edo empleo@egaz.eus helbidera idatzi. Agentziako langileek eskatzailearen eskura jarriko dute Lehen Aukera programan parte hartzeko egin beharreko izapideei buruzko beharrezko informazio guztia.