Mahats-luku baten argazkia, jcomp-ek sortuta – www.freepik.es
Txorierrin ospatuko da Mahasti Artean-Entre Viñedos 2022 jaialdia, irailaren 9tik 11ra bitartean. Urdaibaik 2021ean jaso zuen eta Txorierrik lekukoa hartuko du, kultura, gastronomia, kirola, natura… eta txakolina batzen dituen ekitaldi honetan.
Mahasti Artean Bizkaian zehar ospatzen den jaialdi gastronomiko eta jasangarria da, eta urtero eskualde desberdinetako kokalekuetan ospatzen da. Bertan, txakolina eta kultura-jarduerak batzen dituzten jarduerak prestatzen dira mahastietan, hala nola kontzertuak, zinema, yoga, gastronomia, showcooking…
Aurtengo edizioan antolatzaileek jaialdiaren espiritua mahastietatik haratago zabaltzeko asmoa dute. Proposamena da Txorierriko udalerri guztietara iristea Pintxo-Uztartze Lehiaketa arrakastatsuaren bidez, Bailarako ostalaritza establezimendu guztien laguntzari esker.
Nahi duten establezimenduek jaialdiarekin bat egin dezakete Pintxo proposamenen bitartez, eta, jatetxeen kasuan, Menu-Uztartzearen bitartez. Tokiko produktua erabiliz eta Bizkaiko Txakolinarekin uztartu behar dira, jaialdiaren asteburuan kontsumitzeko.
Lehiaketa sustatzeko eskuorri bat inprimatuko da, eta parte hartuko duten lokalen, turismo-bulegoen, Uribeko ostatuen eta ekitaldirako jarduerak egingo dituzten upeltegien artean banatuko da, besteak beste. Horrekin batera, Jaialdirako txanpon batzuk banatuko dira, Bizkaiko Txakolinaren truke aldatzeko lehiaketara atxikitako establezimenduetan, irailaren 8tik (osteguna) 11ra arte (igandea).
Epaimahai herrikoiak eta profesionalak pintxo onena aukeratuko dute, Deia egunkarian orrialde osoko erreportaje bat jasoko duena. Halaber, establezimenduak 1,80 € jasoko ditu txanpon bakoitzeko, eta bere pintxoa aukeratu ahal izango da jaialdian aurreikusitako jardueretan uztartze perfektua lortzeko.
Jata Ondo Landa Garapenerako Elkartea eta Bizkaiko Txakolina JD Txorierrin ospatuko den ekitaldiaren antolatzaileak dira Egaz Txorierrirekin (Txorierriko Ekonomia Sustapen eta Enplegu Zerbitzua) Bizkaiko Foru Aldundiarekin eta Jaurlaritzarekin batera. Eskualdeko establezimendu guztiak animatu dituzte parte hartzera, 2022ko edizioa arrakastatsua izan dadin.
Jaialdian parte hartu nahi duten establezimenduek ekainaren 13tik 23ra izena eman dezakete, honako bitarteko hauen bidez: Ana Sonia Elorriaga (aselorriaga@egaz.eus| 94 453 63 70) edo Jagoba Martínez (jagoba@jataondo.org | 94 615 66 12).
